Türkmenistanyň Kärdeşler arkalaşyklarynyň Milli merkeziniň “Daýanç” sagaldyş merkezi 2010-njy ýylyň 1-nji iýunynda işe girizildi. Sagaldyş merkezi birbada çagalaryň 280-sini we ulularyň 120-sini kabul etmäge niýetlenen.
Merkezde çagalaryň möwsümleýin dynç alşyny guramagyň we saglygyny berkitmegiň düzgünnamasy we şonuň bilen baglanyşykly ähli kada-düzgünler, talaplar işlenip düzüldi. Ýaş nesillerimiziň döwrebap dynç alyp, saglyklaryny berkitmekleri, wagtlaryny şadyýan, peýdaly geçirmekleri üçin amatly şertler, mümkinçilikler döredilen.
Medeniýet merkezi aýratyn binada ýerleşip, ol ýerde çagalaryň güýmenje wagtlaryny gyzykly geçirmekleri üçin 1 sany kompýuter otagy, 4 sany oýun otagy, 1 sany internet otagy, küşt we stol üsti oýunlary otagy, tans otagy, surat otagy, el-hünärler otagy, tehniki otagy, kitaphana we 202 orunlyk kinokonsert zaly bar. Woleýbol, futbol, basketbol, uly we kiçi tennis oýunlary üçin açyk hem-de ýapyk sport toplumy, şeýle hem 280 çaga üçin niýetlenen tomusky amfiteatr hereket edýär.